A
„ater“, dees heißt: aufdringlich; „aberwitzig“, dees heißt unglaublich.
A falsche Katz, wo krätzt und bißt, dees isch a „Kog“ - uf Hoachditsch Biest.
B
„Binngle“ ischt kui güeta Hong, dees heißt do homma: „Du kascht gong!“
A „Bugrad“ ischt a Hiertebett, statt Scherereien seit ba „Gfrett“.
C
‘s „C“, dees lot mih schwer ‘m Schtih, dees fiegt zu isar Schproch it hi, do hon ich bloaß a Cilli und weags ’m Reim an - Willi.
D
„Diened“, dees heißt drüben, „hiened“ ischt herüben. A „Beafzgar“ ischt a kleina Hünd und wea güet fuurzed, dea ischt gsünd.
E
„Escht“, dees ischt a Vogelnescht, a „Glaibad“ vu z’Mittag a Rescht, und schtatt am Kamm händ mir an Schträl, reacht widrwäärteg, dees heißt „kähl“.
F
„Fääseg“ heißt, das Gas ist rar, a „Glump“, dees ischt a schleachte War, a Kätzle isch bun‘is a „Mulle“, a „Molle“ noch dr Schrift a Bulle.
G
„Griddefuir“, dees ischt kui Golf, dees heißet d’Mediziner „Wolf“, zu Kapriolen seit ba „Gingga“, a Wassrträgar ischt a „Glingga“.
H
„Hägeritzeg“ heißt zäh und schlank, a „Bobl“ ischt a Hosegschtank, rücksichtslos, dees heißt ba „gescheart“, „hindrfiir“ dees ischt verkehrt.
I
„Inghäberet“ heißt „gut im Futter“, „Färlessü“ heißt Schweinemutter. Viel „Pflattra“, dees git an Pfluttr, a Kiibl Rohm an Knolle Buttr.
J
Jetzt stimmt es wieder, heißt bun’is „jitzt fiegt es wiedr, a Wildüfbruch, dees ischt a „Gliebr”, a Niedrgwild a “Gmieder”.
K
Katastrophal heißt “haanebieche”, a Bodemulde ischt a “Tieche“.
Mir händ an „Kineg“ statt am König und an „Honk“ anschtatt am Honig.
L
„Lachegolggar“, dees heißt Güllenpumpe, „Kalbla“ z’Kempte dünda „Schumpe“.
A „Genggar“ ischt a schmale Schlucht und schtatt ar Grippe händ mir „d’Sucht“.
M
Mir händ kuin Garte, abr a „Buind“ und händ sogar a „Huinzegluind“.
Tenne heißt bun’is homm „Bone“ und wie dees Obere heißt, weiß Waibls Done.
N
„Noateg“ heißt bun’is homm arm, „bobeleg“ ischt munter warm.
A „Schaisholzbierschte“ heißt ba „Oahre“ und „unüfhearle“ stochern „schtoare“.
O
„Odem“ dees heißt Elend und’s Gegetail heißt „Isend“.
Dees ischt am Hoan (Hirschhorn) dees zweite End und dees am Galge, dees ischt s’Schtrickend.
P
A „Pflattr“ ischt a moarts Trumm “Hearz”, “Weatag” heißt wittr domma „Schmearz“.
A „Laggl“ ischt a groba Mensch, a “Goltviehbearg” a groaße “Ranch”.
Q
„Quatsch” heißt aigendle öü – “Quatsch“, a „Gschlittr“ noch dr Schrift a „Matsch“, (it viel) dees ischt a „Derdebischt“, dees „Gschribat“ statt am Quatsch a „Mischt“, Lorenz, wenn dees liest, wird lache und denkt amend i sei it bache.
R
Rülpsen heißt do homma „kieble“, schtatt „grabble“ seit ba „knifle“,
Sicherheitsnadel heißt ba „Glufe“, am Wundschorf ischt a „Ruufe“.
S
„Schontebede“ heißt „sofort“, „Löue“ witr dünd „Abort“,
a „Schtoare“ ischt a diira Ascht, a “Hohldixl” a Brunneaxt.
T
“Talgge”, mei, was soll ih sage, ischt kui froid fiir an Mage,
dees ischt alls, was it gonz bache, was ba us am Meahl ka mache.
U
„Uhu“ heißt öu Uhu,
darum: „Juhu!“
V
Viel Gämsbärthiet, dees git a „Gwodl“, viel Schtammtischwind an „Bobl“.
A Schtrumpfverzierung heißt ba „Modl“, a „Schlittele“ eppa onderscht „Rodl“.
W
„Wisgle“ heißt uf Hoachditsch „tünchen“, „Scharmitzele“ det domma „Tütchen“.
A „Hiele“ heißt bu deana „Küken“ und schtatt „Lucka“ händ se „Lücken“.
X
„Xanthippa“ händ zum Glick mir kui,
drfiir schii Bearg und griene „Rui“.
Y
„Y“, dees hämbr kuis, dees hol ih bis in “Babylon“, dänn klingt es hinda öu wie „- lon“.
Dees fiegt öu güet zum earschte Reim und macht de zwaite „schtuberein“.
Z
„Zuinda“, dees sind gflochte „Kearb“, Sensenstiele – „Seagaswearb“.
A „Zubr“ ischt a hilzes “Schaff“, a „Huderle“ ein kleines Schaf.