Schprih und Huigärte

Dr Wannebür hod mid sina Schwestra z’ Koana öfters reachd eng ghedd. Wo’sem wiedr amol reachd wieschd kumme sind, ischa voola Zoan huim i sing Cafe und isch zu na paar Inghuimischa highocked. A hod id viel gseid und ma merkd schu, daß a kuin Güete reicht. No hodden dr Leising gfroged, worum a so schdill sei. No hodda gseit: „Ih kumm grad vu Koana rüf, ja ih hos eigetle schu lang gwißt, do hobba freier amol d’ Höll uf Koana mache wolle, abr do sind die Wiibr so beas, daß deana dr Teifl id bliebe ischd.”

Beandlars Karlen isch bu nam Üsflug a wink a Fehlar ündrloffe, und des hend em die Öschtrichar id für güet gholte. Ma hodden halt 14 Däg inggschbeert. Wo na wiedr huim kumme isch, hod a gseit: „Do siechbas wiedr, die hindrfihre Öschtrichar, d' Mürar schber’ba ing und ussa am Zuchthüs feilt dr Putz ra.”

„Ming Wiib hod allad reacht”, hod Drüdeslars Jock gseit, „wo ne züener gseit ho, ih bring vum Johannamart a nuis Kleid mid, seit die doch: ,Du bringsch ja doch kuis.’ Ordele hones vrgeasse, abr ma siecht doch, daß se allad wiedr amol reacht hot.”

Ir Hitlarzidd hobba id viel offa sage dearfe, ma hod schu Obacht gi miesse. Müsse Done isch mid a etle Glichgsinnta im Adlarwirt ghocked und hend ibr de Hitlar gschimpft. Wies hald a so ghot, uina hods doch im Rothüs gmealt.
Dr Birgarmeischtr Fink hodden dr moanads glei voarglade,und hodden i Zang gnohme. „Herr Schugg, gestern haben Sie im Adler etwas zuviel gesagt.” No hod dr Mussar gmuid: ! So beas isch des id gwea, worum, wea hod nammas gseit?” Noch ar längre Debatte, hi und hea, hod dr Fink gseit: „Diesmal will ich noch ein Auge zudrücken. Sie zahlen 20 Mark in die Winterhilfskasse, das soll eine Warnung sein, und packen Sie ja nicht noch mehr aus gegen unseren verehrten Führer.” Ündr dr Tiir hod se dr Mussar nomohl gonz umdreht und froged de Birgarmeischtr Fink: „Was wured nocha koschde, wenn e amol gonz üspack?”

Bum Schwobmändlar hendse wiedr amol Händl ghedd und Theres, a gonz a regentegs Wiib, isch glei mid am Ofeschidd uf en loasgange und ea hod des schu kennt und schluift ündr de Tisch ning. I deam Moment klocked nammar a dr Kuchestiir. Do isch se vrschrocke und seit: „Mach de üssa, ‘s kud nammar.” Ea seal bliebt ündrem Tisch hocke und seit: „ Iez bliebe grad mid P’fließ do hinna hocke, daß ba siecht, wea bu is Hearr ischd.”

Micheles Willibäldle hod denn herrgoddeg brogle kinne. Amol hodda vum Bearghoibe vrzellt und seit: „Mir hend amol so hoach an Groht higmäht, daß br de erseht Mahde hend ibr d' Wänd nüs wearfe miesse, daß br an Blatz zum Schdong kriet hend.”