Schprih und Huigärte

Siegfriede Wilhelm hod em Luß dünda Schdroibe ghoibed und i deana Möser isches eabar naß gwea. No hodda mid em Oxe am Rand vu so am Üszugsgrabe a Füedrle Schdroibe glade. Kurz voarba uf de Weag üe kumm isch, schnidd a Rad im Wase ing und schu felld des Füedr um. Wie ’s dr Deifl will, kud dr Benefiziat Merk mid no uim vum Karatsbichl hea und siechd des. No frogeda gonz ordele: „Hoi, Herr Brutscher, hand se umgschmisse?” No hod dr Wilhelm schu a wink sear gseid: „Ih doch id, desch schu seal umgfalle.”

Bum Schoch hobba Drilling khedd. Iez isch amol de old Schochin mid am kleine Wägele de Maart üe gfahre. Die Kind sind schu namma jähreg gwea, und se hod grad zum Zieche khedd. D’ Gerschtrubarmändlare hab se no i nan Huigärte brochd und hod se gfroged: „Beigodd, glieched die anond, all wie ra’grisse, ja wie kennschde die ussanond?” No hod d' Schochin gmuid: „Desch doch gonz uifach, die hend all dri an Name, de hindre dedd isch d' Ursl, des do isch d’ Ann und de voadr desch d’ Marie.”

Logelars Otto sing Wiib hod a Wäscharie khedd und mid deam Vrnasse ih dear kolde Wäschkuche hod se halt öu so ihre Wehwehchen khedd. Wo na wiedr amol huimkumme isch, hod se gjommred, daß es so im Kriiz und i de Knie häb, de glingg Aggsl bring se härb no iberse und a gschdäärs Gnaak häb se öu und suchdeg se se öu no drzüe. Z’ Obed isch dr Otto no i d’ Reschdratio an Schdammdisch und ded hod a dean Gjommrad vu sing Olde vrzelld. Hindanoche seid a no: „Abr ma weiß ja, d’ Wiibr hend em Johr 365garlei Kronkheita, und do isch abr s’ Hais und Grindweah noid drbii.”

S’ old Binzle isch a Schrienar gwea und hod neabehea gschrienred. Iez kud amol a Viehhändlar, wo na güed kennd hod, und dea froged glei, ob a nammas fail häb. No hods Binzle gseid: „Im Schdaal hone nuiz, abr im Hüs dinn hedde a Brummi, abr die gwändse beider numma anan ondre Schdaal.” I deam Moment lueged s’ Wiib vum Binzle mit am wullene Kopfdüech uffem Grind bum Kuchfinschdr rüs. No seid dr Händlar: „Holla, ische des, die bruchd an lange Haber*, und do gids kui Nochfrog id.”
*Haber = Geißel

Dr Büe vom olde Binzle, dr Hans, isch a schdramms groaß Mannsbild gwea, drum hobban öu bum Schbiehle zu de Leibar* gnohme. Wie dr Büe no ‘s erschdmohl in Ürlöub kumme ischd i deam wäche Häs vu de Leibar, do hod ‘s old Binzle gseid: „Iez lüe bloas dean Molle a, kud dea gladd i nam Kaschberles-Häs, ja schämschde id.”
*Leibar = Leibregiment des Königs