Schprih und Huigärte

Wo ba i dr Kirche de nui Orgl ingbüt hot und a etle Schpendar des Werk a’glüeged hend, no trifft dr olt Jöus de Birgarmeischtr Gschwendar und muit no gonz vrschmitzt: „Die vrmahned mi grad a dine Gmuindsrät.” Wie no dr Gschwendar froged, wie na des denn mui, no seit dr Jöus reacht boashaft: „Waischt, die müescht du ja öu zerscht mit Händ und Fieß tappe, bis nammas gschieds rüs kut.”

Em Birgarmeischtr Bräckle (Brack) hobba vu dr Reachnüngspriefüng a etle Beanschtandünga voargleit. Ündr ondram seit dea Priefar: „In der Abrechnung erscheint ein Zylinderhut, der gehört hier nicht rein, das ist Privatsache, den müssen Sie schon selbst bezahlen.” Des hot em Bräckle garit paßt und a muit: „Ih brüch dean ja bloas fir d’ Gmuind, wenn i namma hi müeß, zum Hoibe leg en allad it a.” Em Johr druff ischt widr die Reachnüngspriefüng kumme. Desmol hot es nuiz zum Beanschtande geabe. Wo die no ferteg gwea sind und ma die Hearre vrabschiedet khett hot, no seit s’ Bräckle zu deam obere Priefar: „Dea Hüet vu feand ischt fei schu widr dinn gwea, i dr Reachnüng, dir henden bloas numma gfünde.”

Fronze Ludwig, dr Birgarmeischtr, hot an Kneacht khett, de Schorsch. Dea ischt reacht fließeg und redle gwea und hot öu seal die Arbata gsea, wo so agfalle sind. Abr wie’nes so goht, amol ischa bum Trübewirt khocked inar reacht ar luschtege Gsellschaft und isch no grad no reacht in Schtahl huim kumme. Iez ischa zmol mibba ündrem Mealke ündrar Küeh dinn vrschlofe, ja as hotten bloas grad an Moment ibrnohme khett. Fronze Ludwig merkt des öu glei und a git em an Knill und muit, was denn huit mit em loas sei. No hot dr Schorsch gseit: „De gonz Nacht hember ,Zum Wohl’ tong und iez isch brs so elend.”

Dr olt Beslar vum ündre Mart isch mit sing Büebe, em Milchar (Melchior), bum Gmuinde gwea. Dr Milchar ischt a gonz a lichts Birschle gwea und hot kui Säftle und kui Kräftle khett, d’ Nochbüre hend gmuit, a sei schu reacht nuiz gweache. Iez hobba i de Möser a nuie Brugg mache miesse, ma hott’se schu ingdeckt khett, abr d’ Ibreis hend no gfehlt. Do hot dr olt Beslar de Sabing i nan heagrichte Bomm ning khöue und gonz lüt gschruie: „A starka Maa hea, woisch ming Büe.”

Schwarze Lina isch z’ Güetenalp gwea und hot no voar dr Hitte a Fuirholz gmacht, ündr ondrem a so a diegene Äscht hot se abkhöue und vrschpriegled. Wie a so a zächa Ascht it uf serschtmol abglong ischt, hot se a wink besser üszoge und wie’nes gnöu hea gange ischt, hot se seal it reacht gwißt, se hot se mit em Bigl seal in Grind ning khöue khett. Wo ner no s’ Blüet am Grind ra grunne ischt, hot se bloas gseit: „Olta Koog, vrschlag de grad seal.”

Dr olt Jockar hot amol em Mayer ar Birgsöu an Beare üfbinde welle. Des hot dr Mayer abr glei gmerkt, daß do nammas it schtimmt. No hot dr Mayer züe’nem gseit: „Wenn de schu luigscht, no luig wenegschtens ordele.”