Schprih und Huigärte

Dr Metzgar Schugg isch denn öu öfters is Tal ning zum Metzgvieh köuffe. Seal ischa ja a bekannte und groaße Maa gweache. Iez ischa öu amol widr vu Hüs zu Hüs und hot ums Vieh gfroged. Wie na do zum »Dirar« am Schtaigele kumme isch und det ar Hüstir klocked, no goht omma domm a Finschtr uf und d’ Dirare wirft em an Kupferzweiar ra und seit: „Iez vrschwindscht, mir hend seal it mea.” - Se hotten fir an Beattlar aglüeged khett.

So hot dea Metzgar Schugg deana Tälrar viel Vieh abköufft, abr es hotten allad a wink vrzinnt, daß de meischte Tälrar bum Konsum ingköufft hend und bu ihm it. No hotta gonz boashaft sage kinne: „Bum Konsum köuffed die de mindscht Schtrichwurscht und am Sunntag schtoht ba no reacht hoafferteg uf em Schteffl und stoared i de Zäh ummanond, bloas daß d’ Lyt muine miessed, se häbed öu Fleisch zeassed khett.”

Wo ba anna simnezwuinzg de Tennisplatz mache het seile, do hot se dr Gmuinds- rot eabar lang driber berote. A gonze Schtünd hobba ’na vrzellt, was des sei und wie güet des sei und so furt. Dr olt Schoch hot se it ibrzeige long und voar ba zur Abschtimmüng kumme ischt, hotta gseit: „Tind nu a wink gschtädt, do wär es doch gschieder, se täted zerscht s’ Schaffe leane voar se deane Bolla noche schpringed, zletscht vrleggled die no mit deana Bolle und no kas Gmuind vrholte.”

Logelars Otto ischt Beargfihrerobmaa gwea. Do hottes denn öu sing kinne, wenn nuiz gange ischt, daß ba im Beargfihrerschtible oder gar bum Moarewirt dined khocked ischt. Amol, wo öu schu grad tägwies nuiz loas gwea ischt, sind a zwoa gonz üfgschwänzte Wiibr durgloffe und hend no de Bergfihrar-Tarifingteilüng voarem Schtible duß glease und sind no weile widdrgange. No hot dr Logelar gseit: „Die hüre Fremde gend huir widr garit hea, bloas de fremde Hüra sind all schu do.”

Waltars Josef hot allad bum Neaslar d’ Mill kholed. Ündram Krieg isches gwea, do ischa amol schpäddr dra gwea und bum Neaslar hobba d’ Mill schu furt dong khett, ma hot se ja miesse abliefre. Wie bam no seit, daß ba kui Küehmill mea häb und daß a drfir a Gaißmill hong kinnt, no hotta gseit: „Nui, Bigott, a Gaißmill gere kuine, lüeged nu d’ Walsar a, die hobba bloas mit Gaißmill üfzoge, die meggred huit no.”

Do isch ir Reschtratio a moards Hoachzyt gwea, as sind öu gonz viel Walsar hus gwea. D’ Museg hot gschpielt bis an Moarge und vu deana Hoachzytsgescht sind eabar etle üstaged. Mibba em Voaründer kut dr Logelar zum Broatzyte i d’ Büreschtube ring und do hocked schu no etle Ibrnächtege. Zmol kut widr a Walsar vu dussa ring und hocked zu Otto’ne hi, a hotten öu kennt. No focht dea s’ Brogle a und muit, daß ba do schu no nobl geasse hab, ea häb bloas in Schtahl huim miesse, sis wära öu do bliebe. Wie na no seit, daß a soviel schu lang numma geasse häb, hot dr Logelar gseit: „Ja, des ka br denke, die kreaged ja it gnüe die üsghüngrede Walsar.” Am Moarge, wo na uf d’ Woog na sei, do hab a grad gseache, wie Hanse-Karies Büe huim sei, dea hab am nüsgong grad no s’ letscht Tischtüech gfreasse.

Dr olt Medardes, a ischt schu namma Siebezg gwea, hot gseit, ea sei iez schu olt, abr a het öu bloas no uin Wünsch: as sott iez dr Friebergsea ebevoll Freßtabak sing und ea mibba dinn, ea tat se schu no loas freasse bis an jüngschte Tag.

Minekusse David und Lixars Seppl hend bum Künschtmolar Ohmert de Hag mache miesse. Wie se grad a ordele Eggsühl ningschlaged, kut dr Molar Ohmert dohea und lüeged züe. David hot die Sühl ghebbt und dr Seppl hot mit em Mearschl druff gschlage. No seit dr Ohmert, ea häb sine Künschtlerhände mit einer halben Million versichert. No hot David die Sühl löuffe long und zum Ohmert gseit: „No hebbse grad du, die Sühl.”