Schprih und Huigärte

Em Sunnekeallar hobba vrzellt, daß do a Maa vu Minke do gwea sei und dea well, daß Gmuind an Sea im Oybele mache sodd. Dea häb öu die Maa vur Gmuind und öu die vu dr Oartsgmuind schu zämedkumme long und des vrkartet. Iez kud Siegfriede Rüedölfle drzüe und ma hoddem uf sing wündrgeal sing alls a wink ibrtriebe vrzellt. Des hodden narred gmacht und am Neabetisch hocked a paar vu deana Gmuindsrät. Die fehrt a glei gonz zoaneg a: „Dir Leffas brüched kuin Sea em Oybele, dir vrsüffed schu a so i uibra Schulda.”

As isch i de 30-gar Johr gweache, do hod d' Gmuind a nuie und greaßere Realschüel büe welle. Abr wo hi. As sind schu a etle Planünga gloffe und dr beseht Oart wär Wendelars Wendle Frezzackar gwea, zwischba dr Friebeargschdroß und em Riddhalleweag. Iez sind die Birgarmeischdr Fink und Keglar zu Wendle gange zum Vrhondle. Lang und breit hend se ihr Aliege voartrage und Wendl hod s’ schwätze long. Wo se amol üfgheard hend, hot dr Wendl gfroged: „Ja, was hendr fir a Priisvoarschdellung?” No hod dr Keglar gseit: „Ja, was man so üblich bezahlt, für den Quadratmeter eine Mark fünfzig.” Do isch dr Wendl id ingvrschonde gwea und seit: „Nix do, ih will soviel as wie dir vu mir vrlanged am Friedhof duß.” Do hod dr Keglar gmuit: „Aber Herr Witsch, das geht doch nicht, das ist geweihte Erde.” No seit dr Wendl: „Wieso, um des Geald wo dir vrlanged, ka’ne ming Frezzackar öu no wiiehe long, no wird as schu wert.”

Z’ Koana hobba Käppi nui hearichde long und as hod lenger düred as ba greachned ghedd hod. Iez kut amol Gigars Wilhelm zum Adlarwirt ning und ded hocked dr Wannebür. Ja, die zwie hend anond allad gean üfzoge. No seit dr Wilhelm: „Wie lang dreckled dir no umanond weags deam bizle Käppi.” No seit dr Wannebür: „Frog id so dumm, du bischd doch a allem schuldeg, mir wäred schu lang ferdeg, abr mid ding nasse Niederdoarfar Sond hobba inna öu vrbutzed und iez hend is de gonze Heilege ‘s Gschnuddr kried und jedmol wenn no so a Heilega an Nießar düet, felld glei a Pfladdr Butz ra.”

Waibls Done isch vum Schdengar, em Hoorschniedar, rum kumme und no im Wilde Mändle züekhert. No hodda ded vrzellt: „Des Hoorschniede wird ahebe allad tiirer.” Wil kuina nuiz gseit hod, no fehrt a widdr und macht mid dr Hond so zwickege Bewegünga, as ob a a Scheär i dr Hond häb: „. . . abr des leere Zwicke müeschde alls mitzahle.”