Schprih und Huigärte

Siegfriede Rüedolf ischd im Sunnekeallar ghocked mit am ordelene Niggl und hod a wink brogled. Ündr ondrem seit a, daß vu sina drii Fehla de Kleinscht ihm ussem Gsicht gschnitte sei, so tei die ihm gliiche. No hod Michelars Fronz gseit: „Ih mui die gliiched dir all drii, drum sind se no ledeg und geared s’ kuina.”

Mayers Karle hod vrzellt, wo se no bum Prießhüet gwohnt hend, häb a als Büe öu a Luftgwehrle ghedd, as sei numma so güed gange. Wenn se no bum Adölfle dined am Holdrbomm uf Schpatze gschosse habed, do seied doch oft die Schpatze ussem Bösche rüs gjuckt und hend die Kugla gfocht.

D’ Neablhoanbah hod vu dr Gmuind an Bode welle, ded am olde Seageschtadl. Iez hobba em Gmuindsrot hi und hea gschwätzt, was ba düet und was ba fir de Bode vrlange ka. Ma isch no uis woare und bus Abschtimmüng hos Michel Anton glächled und drgeg gschtimmt. Nochaie hod dr Witschjakowsky de Anton gfroged, worum a so hindrgründeg lächle bu sinar Gegeschtimme. No hod dr Anton gseit: „Dir kinned de Bode schu vrhondle, abr zerscht sodda uim gheare, no gheart a dr Oartsgmuind.” No hod dr Trautmann, öu a Fremda, wo em Gmuindsrot gwea isch, gfroged: „Warum sagen Sie das nicht vorher?” No seit dr Anton: „Ih mui, dir kinned all a Platte (Lageplan) lease und ih ho nuiz gseit, wil es ho wisse welle, was uib dea Bode wert isch und iez weiß es,”

A ondrsmohl hobba wiedr um an Bode ghuigardet em Gmuindsrot und do seit zmohl dr Traulmann gonz lüdd zum Witschjakowsky: „Schau mal den Berktold an, der grinst schon wieder, der läßt uns wieder ein Kuckucksei ausbrüten, ich stimme mit Berktold dagegen.”

Charlotte Stirius isch vum »Allgäuer« üs z’ Obrschtdoarf züeschdändeg gwea. Iez hobba i de drißgar Johr an Maibomm uf em Martplatz üfgschdellt und wo na gschdonde ischt, do hod d' Museg gschbielt. Viel Prominenz isch i de SA-Uniforma umanond gwea und glei neabes em Musegdirigente, em Waltars Josef, isch dr Kurdirektar Plenio gschdonde. No kut d’ Stirius zu deam hea und froged: „Was kann man über den Maibaum alles schreiben? Mir fällt einfach nichts ein über den Brauch.” No hod se Waltars Josef inggmischt und seit: „Des glangt schu, deara Bricht hone schu viel vu dr glease, wo dr nuiz inggfalle ischt.”

Häselars Peter hod bu Kiehbeargars Wilhelme i Emnars-Hüs em Kohlelager gschaffed und jedan Obed isch dea an Händ und Gsicht kohlschwarz gwea. Deaweag ischa no jedan Obed in Adlarwirt an Schtammtisch ghocked. No hod dr Adlarwirt amol züe nem gseit: „A wink kinndsch de schu Wäsche, so drecked allad do hea hocke isch doch it güet, soviel Wassr wur bum Gigar schu i dr Näche sing.” No hod dr Peter gseit: Weischte no, wie ba de Hirschwirt weags am bizle Wassr wo na in Wing ning tong hod, gschtrofed hod, nui Done, weags em Wassr laß be id schtrofe.”

Kalkbrennars Englbert isch ündrem Krieg in Ürlöub kumme. No hodda dohuim vrzellt, daß ba mid so ar Klepperkischte, ar JU 52, vum Kaukasus üsgfloge hab. D' Müeddr hod mid em offene Mühl glosed, was dea vrzellt, zmohl hod sen gfroged: „Was, mid am Fliegar, ja, wie hoach isch dea dom gwea?” No hod dr Englbert gseit: „Des weiß e id so gnöu, ih ho bloas gseache, daß ibraal so probellar-vrmähte Engl umanond gflacked sind.”

Luzinesse Josef hod amol an Markschdui vrsetzt ghedd und ma ischem druff kumme. Iez hod des a A’zeig geabe und isch uffs Gricht kumme. Iez hobba sing Schwester Theres mit als Zeuge, daß er des it tong hab. Wo se bum Gricht ning sind, hodda zur Schwester gseit: „So Resa, iez bisch gschied und schdellschde reacht dumm.”