Neaslars Done hot bu Seewegs Hoachzyt gseit: „Isr Herrgott hot belder schu allerhond mitgmacht, aber a dearage Hoachzyt belder noit.”
Waltars Josef hot de 80gar gfiered. Wo ba bum Glickwinsche det gwea isch, no hot a gseit: „Weisch, wenn de amol ibr 80ge bisch, no hosches gwunne, do schtearbed numma so viel.”
Bu nar Liich isch es amole gweache, ma hot de Birgarmeischtr V. vrgrabe, all Rednar henden globt ibre Schealekineg, öu dr Pfarrar hot gseit, was des fra brava, christlena Maa gwea sei und ma kinn dean allad als Voarbild neame. Öu de näschte Grabrednar hend öu all a wink z’viel globhudled. Des hot Spissles Karlen, a isch fir so nammas bekannt gwea, numma gonz i sing Rohme ning paßt, no hotta gonz lüt zu sing Neabemaa gseit: „Du, ih mui mir gänd, mir sind uf dr falsche Liich.”
Em Trettach-Hotel hend amol a paar beesre Lyt mit a etle Gmuindrät zämed geasse. Ma hot a kleine Fier khett. Dr Gschwendar, dr Hotelbesitzer, isch öu Birgarmeischtr gweache. letz isch do alls wiiß ingdeckt gwea mit Silbergschier und Tüechservietta. Zmol siecht dr Jäcklar, daß bu ihm dett kui so a Tiechle isch, ma hots halt ibrseache khett. A hot abr de Birgarmeischtr a wink muine welle und hotten gonz spöttisch gfroged, ob do bloas de gwiese so an Lumpe kreaged, so an gschterkte. Dr Gschwendar isch glei bschlage gwea, wo na siecht, daß do tatsächlich so a Serviettetüech fehlt und seit: „Mei Josef, des müeschte schu entschuldege, aber bu is hot niemed gwißt, daß Du öu a Trielar bischt.”
Gigars Wilhelm isch em Trübewirt und hot an bachene Goggelar geasse. Neabedet hocked dr Birgarmeischtr Schallhammar und lüegedem züe, wie nes deam schmeckt. Zmol hotta i sing breite Oberbayrisch gseit: „Du lebst net schlecht, i kant mir des bloß an am Feiertag leistn, so an Goggl z’essn.” Dr Wilhelm hot bloas gschmunzled und seit no: „Hetsch öu nammas gschieds gleaned, no kinscht öu an Goggelar freasse.”
Lonzars Hans vu Rübe isch em Wilde Mändle gwea und hot grad zahlt khett, no lüegeda so i sing Gealdbittl ning und seit zu da ondra: „Sisch menksmol schu gschpässeg, wie se des zämed trifft, s’ Geald isch ferteg und dr Durscht isch öu ferteg.”
Verwandte Themen
Heft 4 → Sprih und HuigärteHeft 3 → Sprih und Huigärte
Heft 2 → Sprih und Huigärte
Heft 49 → Schprih und Huigärte
Heft 29 → Schprih und Huigärte