Schprih und Huigärte

Beslars Mathies isch zum Doktr Knöckel gange, a hod inam Knie Läscht ghett. A hod d'Hosa it ra tong und d' Fieß öu it gwäsche ghedd. No packt dr Knöckel dean Füeß, buigten rum und num und hi und hea und dr Mathies oicheled gonz schii. No seit a: „Ja, ja, Mathies, da kann man nichts machen, das ist eine Alterserscheinung, höchstenfalls noch mit einer Spritze.” Des hodda it welle und seit zum Doktr: „Desch bigott kui Olterserscheinüng, diesa Füeß düet br garit weah und die sind bigott gli olt.”

Bu de Ürchar uf der Emne isch dr Älter gschtoarbe. Ma hodden schu im Kronkehüs ghedd und glei i d' Lichehalle brocht. Dr Moanats kut dr Benefiziat uf d' Emne zu deam sina Briedr und froged, was ba gong als Lichered sage kinn. Ea froged ündr ondrem: „Was hat Ihr Bruder zu Lebzeiten getan oder was ist er alles gewesen?” No hot dr Wilhelm gseit: „Was wedd a gong schu gwea sing, a reachta Läggl!”

Lumpesars Wilhelm hod amol urn a etle Maa gugge selle zum Gmuinde. Ma hod voarghedd, de Doarfba üsrumme und öu a meahnra Schdella die vrfühlede Lade üsweagsle. Zum Froge hod a gonz em obre Maart agfocht und do ischa zu Siegfriede Wilhelme kumme und froged glei: „Hoscht it drwiehl a d' Gmuind, magsch a so nuiz tu.”

Schwarze Mahle hod gean gschofkopfed. No isch se amol ir Schießschdadd gwea mit so ar Ründe. Zwischbadur hobba oft no en extra Fluigarte ghedd und uimohl do händ'se vu dr Höll und em Teifl ghuigartet. A Wiib wo kui Kind und kuin Maa ghedd hot, hod se do gonz vrifred. No hot's Mahle züener gseit: „Du bischt bigott glei schtill, du hosch no nie d' Höll und de Teifl dohuim ghedd!”

Dr Weißenberger isch im Hof gwea mit am Isereache und hot de Riesl a wink ibrreached. A hots it so schtreng gmacht und luined am Reacheschtihl. Do kut Kochs Hugo voarbi und froged reacht uifälteg: „Hoi, Fritz, was tüeschde?” No hod dr Weißenberger gseit: „Öu nuiz wie du!”

Bärtesse Josef hod an Jüngjägar zum A'leane und Mitgong ghedd. Ietz ischa mit deam am ussre Falke z'Schlappold dom gwea und hoddem a groaße Schar Gems zeiged und gseit, daß die a kui Füeddr gehnd und wenn es no so viel Schnea hot. No froged dea Lehrling: „Was fressen die dann im Winter bei vielem Schnee?” No hoddam erklärt, daß die a Gras ündrem Schnea rüsscheare deied. Des hod dem Jüngjägar it glangt und a froged glei wiedr: „Ja, und was fressen die, wenn es hier zwei und drei Meter Schnee hat?” No hod dr Josef a wink sear gseit: „Ja, no freassed die halt nammas ondrs.”

Minekusse David isch öu schu älter gwea und isch mit em Roos vum Bomme huimkumme, und wie na bum Schtuinar voar deam Lädele ussem Schlitte will, ischa hofreacht a de Schlittschtängele vrhanged mit de Grifschüeh und mibba i dr Schtroß dinn gflacked. Lonzars Hans hod des grad gseache, goht hi und hod em üfgholfe. No seit de David: „Die Schlittschtängele weared ahebe all Johr heachr.”

Weiße Wible isch bum Doktr Wolf gwea und hodse weags am Ischias behondle long. Dr Wolf hod'r a Schbritze geabe, wil es gar so beas gwea sei. Am ondre Tag isch se widr kumme und hod gmühled, das es mindr sei mit der Schbritze, se kumm numma zue'nem, se laß se numma so bloge. No hod dr Doktr Wolf gseit: „Isch br öu reacht, weags deam hend ih und ming Daggl gli viel z'freassed.”