Wie ba freier zuegschtellt hoat

Voar vierzg Joahr no, doa hoabba z’ Obrschdoarf d’ Paketposcht mit ’m Ros üsgfahre. Hoach ufm Bock dr „Poschtillion”. Dr „Seppl” isch joahrwis isa Poschtillion gwea. Schu lang numma „Königlich Bayerisch”, abr an Schtolz hoat a gli khett uf sing Montür, dr „Josef Idelhauser”. Ma hoat ’n nie oandrscht gsea, as mit Schtiefl, de leadrne Hosa, im blöue Kittl und mit ’m Zylindar.

Es hoat a goanz bravs Ros brücht im Mart, uis woa gean schtoang bliebe isch, bis dr „Poschtbot Wagnar” sine Paketr vrtrage hoat. Dr „Max” isch a derena gwea. Viel Joahr hoat a de Poschtwage zöge, de Wintr de Schlitte, riebeg, langsam, hü und brrrrr .. . Abr wenn es noacha d’ Oscht-Schtroaß nüf gange isch, hoat es ’m zmoal pressiert. Ea isch nie dur b’m „Cafe Braxmair” (huit Trettachstüble) oahne a paar Breckle Zuckr. Die Kuchefinschtre sind doa braits bis zum Bode ra gange. Wembam it glei üfgwartet hoat, noa hoat dr Max ’s obr Finschtrle mit dr Näs üfgschtoaße, des isch weagedeam öu nie bschlosse gwea.

Drnoa hoabba noacha mit am kleinere Wage d` Poscht all Tag uf Tuifeba num gfiert, joahrüs, joahring. Doa hoat no a „Passaschier” kinne ufm Bock mitfahre, ufm Wage odr Schlitte, ’m Lenzeg hoat es halt allemoal Läscht geabe. Wenn d’ Loandschtroaß schu g’oabred hoat, isch a dr Braita ning, i deam Schatteloh, no alls zue gwea. Ma isch, so guet wie miegle, mit’m Schlitte i de Fealdr neabes dr Schtroaß hea gfahre, bis na a d’ Braitabrugg.

Dr Seppl isch mit’m Eltr i d’ Rente kumme. Lang hoat ja öu „Leisings Karle” d’ Poscht gfahre. Deam isch abr a blöue Kappe gnue gwea.

Woa dr Seppl gschtoarbe isch, hoat ’s „Freilein Stirius” im Blättle gschriebe: „Bekannt war er durch sein schönes Hornblasen . . .” Doa hoat b’nies alls glached und die, woa joahrwis mit ’m Seppl i dr Kamar gschloafe händ, händ gseit: „Bloase hoat a schu, abr hinda nüs . . .”

Glei woa dr Krieg üsbroche isch, händse a Poschtros ingzoge. Ma hoat numma liecht toang, i dear Zit. So hoat d’ Muettr de Poscht-Schtal noacha goanz üfgeabe. Es wär numma so wit gwea, ufs Jubiläum, 50 Joahr.

Mea as gwissehaft, hoat se dr Poscht alls zruckgeabe. De goanz Montür, schiene, wieße Leadrhoasa, waich wie a Finschtrleadr, blöue Kittl mit deana silbrna Litza, wieße Leadrhändsche, Zylindar mit wießblöue Feadrbosche - an goanz nuie no drzue - alls, bis uf de letschte Knopf, woa ’s Poschthoan abdruckt gwea isch... Des ruit be huit no. Abr a Poschthoan zum Bloase, hämbr, wie gseit, nie kuis khett.