Schprih und Huigärte

Büechene Max isch z’ Bibralp Hirt gwea und isch am Schaid mit Üsscheide grad ferteg gwea. Ietz sind do no etle Ündrländar ummanond gschdonde mit am Arfele Schtrick um de Hals, die hend no uf de Holdewangar gwarted, wil se det öu no a Goltvieh khedd hend. Wo ba vu de Scheidschtange weg goht, froged a so a jüngs Wiible de Max: „Sie haben jetzt alles Vieh weg, aber da stehen noch viele Bauern mit Stricken um den Hals.” Max lüeged des Paarle so a, ea gliched reacht vrschuicht, so seidt a: „As kud schu no mea Vieh, do brücht ba die Schtrick, du hosch ding Leffas sicherle öu id am Schwonz huimzoge.”

Doans Hans isch Voarschtond bum Vetranarverein gwea und bekonnt als güetr Liicherednar. Wo ba Wexe Brosen vrgrabe hod, ischem doch a kleina Vrschpreachar ündrloffe, wo na seidt: „Lieba Brose, du hoscht als tapfrer Soldat viele Schüsse gehört, aber die dry Schuß wo br voarhea los glong hend, die hosch de numma gheart, do hend se dir ding Deckl schu züegmacht khedd.” – Wo na elter woare isch, sind no öfters so Vrschpreachar bu de Liicherede undrloffe. Wo ba Bäschles Engelberte vrgrabe hod, do hod a öu ündr ondrem gseidt: „ ... wir stehen an deinem Grabe, wir Dreier-Jäger. Habe alle unsere Kameraden in allen Landesteilen mit Postkarte angeschrieben. Warum diese zu deinem letzten Gefecht nicht gekommen sind, weiß ich nicht. Wahrscheinlich sind alle schon gestorben und haben deshalb die Karte nicht mehr gelesen.”

Dr Leineweabar vu Hindelong isch wiidr amol uf em Gricht gwea. Wo d’ Vrhondlüng rum gwea isch, seidt dr Leineweabar zü deam Richtar: „Hohes Gericht, ih ho no a Frog.” Ingladend winked dr Richtar: „Bitte fragen Sie”. No hodda mit am schmunzlege Gsicht gfroged: „Dearf ba zu Schbitzbüebe öu Hearre sage?” Dr Richtar, güet glöuned, muit no: „Selbstverständlich, da kann nichts passieren.” No dreht se dr Leineweabar zu dene Schöffe hi um und macht no an Buggl drzüe: „Nochad, pfieddena Gott dir Hearre.”

Als i de fufzgar Johr ibr d’ Nacht amol dea markanta Beargzapfe ‘s »Wilde Mändle« ra’gfalle gwea isch, ja es isch am Moarge uifach vrschwünde gwea und niemend hoddes eigedle gmerkt. Im »Christlichen Hospiz« hod a Gruppe vu olda Gäscht i dr Halle driberd dischkutiert. Uina, a nuia Gaschd, wo no garid reacht B’scheid gwißt hod, bloas allad ghert hod, daß ‘s »Wilde Mändle« vrschwünde sei, goht no zur Fröu Schüle numm und muit: „Nehmen Sie es doch nicht so tragisch, Ihr Mann kommt bestimmt wieder.”

Am Fronliichnamstag isch alls, wo nammas z’dind khedd hod, i d’ Reschtratio ingglade gwea zu nar Broatzidd. Menksmol hod des öu a lange Hock geabe. Gege Obed hi sind a etle Musegar und ui vum Gmuindsrot a wink hindranond kumme. Dr Birgarmeischtr Neidhart isch wiedr drzüe kumme und des hod de Logelar g’irrt. No seidt a zum Domas: „Ih weiß um ding Muining, alle Musegar sind Lumpe, abr id all Lumpe sind Musegar und bisch kui Musegar und des müeß gseidt sing.”