Schprih und Huigärte

Nochem Krieg sind ibraall, öu bis i de kleinschde Dearfle, so Zaubrar, Hypnotisör und Geistheilar wie dr Gröning oder dr Tranti üftöucht und hend Voarträg kholde und hend all die Sääl voolbrocht. Ih dr Maarthalle z’ Sünthof isch öu so uina gwea, mit deam Thema: „Woher stammen die Menschen und wie geht es nach dem Tode weiter?”. Des müeß a blendenda Rednar gwea sing und uf alle Sidda hi bschlage. I dr offene Diskussion hend se dean it in Vrleageheit brocht. Nochem Voartrag sind no etle in Löwirt num und hend det wiedr dischkriert. Am Schdammtisch isch züefälleg Gigars Wilhelm vu Oberschdoarf khocked. Dea hod a Wiile glosed. De uine hend gmuid, des mit Adam und Eva isch doch a Märchen und i dr Evolution, daß dr Mensch vum Affe abschdammt, des hend de ondre id fir echt gholte. So isch des lang hi und hea gange und zmohl hod dr Wilhelm si dringmischt und seidt: „Dir sind doch all neabeded, des uinzeg was ba bewiese ka, isch, daß d’ Affe vu de Sünthofar abschdammed.” Mei, do sind se wild woare, wemban id so güed kennt het, do wär a id so glimpfle vrtrunne.

Dr Birgarmeischtr Brack vu Oberschdoarf hod amol gseidt: „Ih sag id so und ih sag id so, denn wenn ih a so sage däd und ‘s ging vrkehrt nüs, no däd ba sage, siesch, dea hod des öu a so gseidt.”

As isch ir Birgsöu im Büreschdüble gwea, do sind bloas no zwii Tälrar khocked am Schdammtisch, no kut a jüngs Pärle ring und froged gonz ordele, ob se do heahocke kinned. Seraphine Hubert isch öu ded gwea und seidt öu glei: „ Hocked nu hea, ‘s kut a so niemed mea.” Die Zwii hocked no ordele hi und schu kut Keallere und froged, ob se a Bier welled. No seidt dea Maa: „Nein wir möchten etwas Warmes.” No hod dr Hubert gonz schböttisch gseidt: „No kinnedr schu a Bier bschdelle.”

Im »Wilde Mändle« isch dr Schdammtisch ziemle vool gwea und grad lüdd isches heagange. No kut a Pärle ring mit am kleine Büebe, kasing vier Johr isch a gwea. Die sind no an ründe Tisch hihocked und no seit des Bieble gonz lüdd mit am gwoltätege Ton, abr inam sübre Hochditsch: „Jetzt will ich eine Cola haben.” No hod dr Doressar gseidt: „Iez lüeg dohea, so klei und schu a Priiß.”

Dr olt Schbäth, dr Grindar vum Oberschdoarfar Büretheatr, isch amol in Hirschwirt kumme is Neabezimmer, wo a wink de bessre Lidd khocked sind. A hocked drzüe hi. No vrzellt a gonz wichteg: „Mei, da war heit wos los, des ko ih euch sogn, da gab es heit Tote, da hab ih au no zuegschaugt.” Iez sind se extra wündrgeal woare was do gong bassiert sei und wo dea Unfall gwea sei. No hoddas a wink liide long und zmohl seidt a: „Wir’i heit vom Foitenbach runter glaffa bi, do war bei der Freibank die Tiir offen und do hod dear Schratt a Koibi gschlacht und do bin i nei und hob a no zuagschaugt.”